ಸವಿರುಚಿ : ವೆಜ್ ಫೋಲ್ಡರ್

ಬಹುಶ: ಅಡಿಗೆಮನೆಯಲ್ಲಿ ನಡೆಯುವಷ್ಟು  ಸಂಶೋಧನಾ ಕಾರ್ಯ ಬೇರೆಲ್ಲೂ ನಡೆಯುವುದಿಲ್ಲ ಎಂದು ನನ್ನ ಭಾವನೆ. ಹಾಗಾಗಿ ವಿಭಿನ್ನ ರುಚಿಯ ತಿನಿಸುಗಳು ಪ್ರಾದೇಶಿಕತೆಯನ್ನು ಮೈಗೂಡಿಸಿಕೊಂಡು ಉಣ್ಣುವವರ ಜಿಹ್ವಾಚಾಪಲ್ಯ ತಣಿಸುತ್ತವೆ ಹಾಗೂ ಆರೋಗ್ಯವನ್ನು ವರ್ಧಿಸುತ್ತವೆ.

ಪುತ್ತೂರಿನ ಶ್ರೀಮತಿ ಸಾವಿತ್ರಿ ಎಸ್ ಭಟ್, ಅವರು ಕಳುಹಿಸಿದ ಒಂದು ಸವಿರುಚಿಯ ವಿವರ ಹೀಗಿದೆ:

ತಿನಿಸು         :  ವೆಜ್ ಫೋಲ್ಡರ್

ಇವೆಲ್ಲಾ ಬೇಕು :
                  ಗೋಧಿ ಹಿಟ್ಟು - 2 ಕಪ್
                  ಸಣ್ಣ ರವೆ - 1 ಕಪ್
                  ಸಣ್ಣಗೆ ಹೆಚ್ಚಿದ ತರಕಾರಿಗಳು - 2 ಕಪ್(ಬೀನ್ಸ್,ಕ್ಯಾರೆಟ್, ಬೀಟ್ ರೂಟ್, ಕ್ಯಾಬೇಜ್)
                  ಕೊತ್ತಂಬರಿ ಸೊಪ್ಪು - 1 ಕಪ್
                  ಬೆಳ್ಳುಳ್ಳಿ ಎಸಳು - 2
                  ಹಸಿರುಮೆಣಸಿನ ಕಾಯಿ - 2
                  ಅಡುಗೆ ಎಣ್ಣೆ  - 4ಚಮಚ
                  ತುಪ್ಪ- 8 ಚಮಚ
                  ಉಪ್ಪು - ರುಚಿಗೆ ತಕ್ಕಷ್ಟು

ಹೀಗೆ ಮಾಡಿ ನೋಡಿ :

1. ಗೋಧಿಹಿಟ್ಟು ಮತ್ತು ಸಣ್ಣ ರವೆಯನ್ನು ನೀರು ಹಾಕಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ.




2. ಹೆಚ್ಚಿದ ತರಕಾರಿಗಳನ್ನು, ಉಪ್ಪು ಹಾಕಿ, ಸ್ವಲ್ಪ ಎಣ್ಣೆಯೊಂದಿಗೆ ಹುರಿಯಿರಿ.
3. ಕೊತ್ತಂಬರಿ ಸೊಪ್ಪು, ಹಸಿರುಮೆಣಸಿನಕಾಯಿ  ಮತ್ತು ಬೆಳ್ಳುಳ್ಳಿ ಯನ್ನು, ಮಿಕ್ಸಿಗೆ  ಹಾಕಿ ರುಬ್ಬಿ.
4. ರುಬ್ಬಿದ ಮಿಶ್ರಣವನ್ನು ತರಕಾರಿ ಪಲ್ಯಕ್ಕೆ ಹಾಕಿ ಚೆನ್ನಾಗಿ ಬೆರೆಸಿ.
5. ಕಲಸಿಟ್ಟ ಹಿಟ್ಟಿನಿಂದ ಸಣ್ಣ ಚಪಾತಿಗಳನ್ನು ಲಟ್ಟಿಸಿ.



6. ತಯಾರಿಸಿದ ಪಲ್ಯವನ್ನು ಚಪಾತಿ ಮಧ್ಯೆ  ಇಟ್ಟು,  ಚಿತ್ರದಲ್ಲಿ ತೋರಿಸಿದಂತೆ ೪ ಮೂಲೆಯಲ್ಲೂ ಮಡಚಿ.

7. ಮಡಚಿದ ಚಪಾತಿಯನ್ನು, ತವಾದಲ್ಲಿ, ತುಪ್ಪ ಹಾಕಿ  ಬೇಯಿಸಿ.

ರುಚಿಯಾದ ವೆಜ್ ಫೋಲ್ಡರ್. ತಿನ್ನಲು ಸಿದ್ಧ. ಇದನ್ನು ಚಟ್ನಿಯೊಂದಿಗೆ ಅಥವಾ ಗಟ್ಟಿ ಮೊಸರಿನೊಂದಿಗೆ ಸವಿಯಬಹುದು. ಬೆಳಗಿನ  ತಿಂಡಿಗೂ ಸೈ, ಮಕ್ಕಳ ಲಂಚ್ ಬಾಕ್ಸ್ ಗೂ ಚೆನ್ನಾಗಿರುತ್ತದೆ.